DISPOSICIÓNS LEGAIS EN MATERIA DE IGUALDADE

Moitas son as disposicións legais que están vixentes actualmente aínda que as leis orgánicas que as promoveron están xa derrogadas.

En materia de igualdade, a Xunta, a través de diferentes Consellerías, foi publicando unha serie de disposicións que regulan a loita contra a discriminación sexual e promoven a igualdade entre homes e mulleres en todos os ámbitos da vida.
A Vicepresidencia e Consellería de Presidencia, Administracións Públicas e Xustiza elaborou un texto refundido coas leis que teñen como obxecto directo a regulación en materia de igualdade.
No DOG do 17 de febreiro de 2016 acaba de publicarse o Decreto lexislativo polo que se aproba o texto refundido das disposicións legais da Comunidade Autónoma de Galicia en materia de igualdade.
Aquí vos deixo o enlace a este documento:

http://www.xunta.es/dog/Publicados/2016/20160217/AnuncioG0244-110216-0005_gl.pdf

Especialmente importante para os centros educativos é o Capítulo IV do Título I: "A educación e a formación para a igualdade entre mulleres e homes", que inclúe os seguintes artigos:

- Artigo 17: O currículo regulador do Sistema Educativo.
- Artigo 18: Erradicación de prexuízos nos centros docentes.
- Artigo 19: Integración da igualdade na formación profesional.
- Artigo 20: As cuestións de xénero no eido da educación superior.
- Artigo 21: Formación en igualdade de oportunidades.

CONVOCADAS PROBAS DE CARNÉS E HABILITACIÓNS PROFESIONAIS.

Mediante a Orde do 1 de febreiro de 2016 (DOG 11 de febreiro), a Consellería de Educación acaba de convocar as probas anuais para a obtención  de determinados carnés profesionais e habilitacións profesionais. 

Adxunto enlaces á orde de convocatoria e ao tríptico informativo:

http://www.xunta.es/dog/Publicados/2016/20160211/AnuncioG0164-030216-0002_gl.pdf

https://www.edu.xunta.es/fp/sites/fp/files/fp/Orientacion/folletos_informativos/hab_car_prof.pdf

CHARLA DE PEDRO REY

O profesor da Facultade de Económicas da USC, Pedro Rey, acudiu onte ao noso centro para dar unha charla ao alumnado de 2º BAC, dentro do programa A Ponte.

A ponencia foi clara, completa e axustada ao tempo que tiñamos, un período lectivo de 50 minutos. Nela explicoulles todo o relacionado coas probas de acceso á universidade, os estudos de grao segundo o Plan Bolonia, os sistemas de becas e axudas ao estudo, os intercambios nacionais e internacionais para estudantes universitarios, os colexios maiores e as residencias universitarias, e sobre todo animounos moito comentando a alta porcentaxe de alumnado que todos os anos superan as probas de acceso á universidade. 

Non foi posible contar esta vez coa presenza dun antigo alumno ou alumna, actual estudante universitario na USC.

Desde aquí dámoslle as grazas a este profesor da USC por dedicarnos este rato do seu tempo e tamén moitas grazas ao alumnado pola súa atención e moitos ánimos a todos eles de cara a estes axetreados meses.

CONVOCADAS AS PROBAS DE ACCESO A GRAO MEDIO E A GRAO SUPERIOR.

A Consellería de Educación acaba de publicar no DOG de hoxe, 11 de febreiro de 2016, a convocatoria para as probas de acceso aos ciclos formativos de grao medio e de grao superior.

Este é o enlace para acceder á orde:

http://www.xunta.es/dog/Publicados/2016/20160211/AnuncioG0164-030216-0001_gl.pdf

E este é o enlace para acceder ao calendario:

http://www.edu.xunta.es/fp/sites/fp/files/fp/Probas%20acceso/2016/calendario_probas_acceso_2016.pdf

Este ano hai novas respecto aos requisitos de acceso; segundo dispón a LOMCE, accédese directamente de grao medio a grao superior, e de FP Básica a grao medio. Só terían que facer estas probas as persoas que non reúnen os requisitos académicos para acceder a estes estudos e que cumpran os requisitos de idade:

- Para grao medio hai que ter 17 anos ou cumprilos ao longo do ano 2016.

- Para grao superior hai que ter 19 anos ou cumprilos ao longo do ano 2016.

PROGRAMA A PONTE

Dentro das actividades que a Universidade de Santiago de Compostela propón para promocionar os seus estudos, está o percorrido polos campus, tanto de Santiago como de Lugo.

Onte 3 de febreiro acudimos a Santiago os alumnos e alumnas de 2º BAC acompañados pola titora e por min, a orientadora.

Foi unha experiencia gratificante e os mozos e mozas desfrutaron do ambiente universitario e aclararon dúbidas nas distintas facultades e escolas ás que acudiron. Ademais o tempo acompañounos e tivemos un día soleado estupendo para ir paseando polas rúas de facultade en facultade.

Sentímonos moi ben acollidos e informados por todo o profesorado da Universidade e desde aquí dámoslles as grazas.

Tamén queremos agradecer ao alumnado o seu excelente comportamento e educación ao longo de toda a xornada.

Remataremos a participación do noso centro no programa "A Ponte", cunha charla que virá a dar a este grupo de alumnos un profesor da Universidade o vindeiro luns 15 de febreiro. Posiblemente veña acompañado dun antigo alumno ou alumna deste centro que agora é estudante universitario en Compostela.